ანა გელენავა • 1661591164

სკალპის ფსორიაზი და თმის ცვენა - როგორ მოვუაროთ თმასა და თავის კანს

ბზინვარე, რბილი და ჯანსაღი თმა დამოკიდებულია იმაზე, თუ როგორ მოვუვლით მას და რა პროდუქტებს გამოვიყენებთ. არაერთი მოსაზრებაა გავრცელებული თმის მოვლაზე, რაც ძირითად შემთხვევაში საერთოდ არ შეესაბამება სიმართლეს. იმისთვის, რომ ჩვენთვის სასურველ შედეგს მივაღწიოთ აუცილებელია პირველ რიგში გავიგოთ, როგორი ტიპის თმა გვაქვს და ვიცოდეთ სკალპის მდგომარეობა.  

თუ გამომშრალი თავის სკალპს შეგაწუხებთ პირველი რასაც იფიქრებთ ალბათ ქერტლის საწინააღმდეგო შამპუნის შეძენა იქნება, მაგრამ იქნებ ეს სულაც არ არის ქერტლი და რეალურად სულ სხვა პრობლემას გადააწყდით?! ამ პრობლემას სკალპის ფსორიაზი წოდება.

 

რა არის ფსორიაზი?!

სკალპის ფსორიაზი არის კანის დაავადება, რომელიც წარმოქმნის თავზე არასასიამოვნო ქავილს და ქერტლის მსგავს "ფუფხს". ფსორიაზი შეიძლება განვითარდეს არამარტო თავზე, არამედ სხეულის სხვა ადგილებზეც. აუცილებელია მის მკურნალობამდე მიმართოთ ექიმს, რათა სწორად დასვან დიაგნოზი და შესაბამისად სწორი მკურნალობის მეთოდიც. 

ხშირ შემთხვევაში ფსორიაზს იწვევს: ჰორმონალური ცვლილებები, სტრესი, მოწევა/ჭარბი ალკოჰოლი, კანის დაზიანება. 

 

 


 

ფსორიაზის სიმპტომები, რომლებიც არ უნდა უგულებელყოთ

ფსორიაზის სიმპტომები საკმაოდ თვალშისაცემი და შემაწუხებელია. ძირითადად ქავილი ყურების უკან, შუბლის მხარეს და კეფაზე იგრძნობა. ქავილის დროს სისხლდენა, წვა და ტკივილი თანამდევია, ამიტომ აუცილებელია ადრეულ ფორმებში დადგინდეს სწორი მკურნალობის ფორმა. 

🔸ქავილი 

🔸ქერტლის მსგავსი კანის ცვენა 

🔸ტკივილი/წვა

🔸მცირე სისხლდენა

🔸თმის ცვენა


 

რა შემადგენლობის შამპუნი უნდა გამოვიყენოთ?

ფსორიაზის სამკურნალოდ არსებობს გარკვეული შამპუნები, მაგრამ საჭიროა ვიცოდეთ რას უნდა შეიცავდეს პროდუქტი, რომ ეფექტური იყოს მისი გამოყენება. ფუფხის დაშლას და მის ალაგებას ხელს უწყობს სალიცილის მჟავა, გლიკოლის მჟავა და ტრიქლოროძმარმჟავა. ასევე, სამკურნალო შამპუნების ინგრედიენტებში გამოიყოფა ორი ძირითადი კომპონენტი: ჰიდროკორტიზონი - ქავილის შესამსუბუქებლად; ნახშირის ტარი - აფერხებს უჯრედების გამრავლებას და ხელს უწყობს მათ გამოდევნას.

მნიშვნელოვანია დანიშნულება ზუსტად შეასრულოთ და პროდუქტი პირდაპირ სკალპზე დაიტანოთ და არა თმაზე. ასევე შეგიძლიათ გამოიყენოთ დამარბილებელი საშუალებები, რაც უსიამოვნო ფუფხს მეტწილად დაშლის.

 

 


 

რა დრო ჭირდება ფსორიაზის მკურნალობას? 

მკურნალობა შეიძლება არც თუ ისე ხანმოკლე აღმოჩდეს, მაგრამ ეს დამოკიდებულია თქვენზე. აუცილებელია ზუსტად მიჰყვეთ დანიშნულებას, სცადოთ სტრესის შემცირება, დაიწყოთ ჯანსაღი ცხოვრების წესი და იზრუნოთ ორგანიზმზე. სკალპის ფსორიაზი არ არის მხოლოდ კანი გარეგანი დაავადება, მასზე მოქმედებს თქვენი ცხოვრების წესიც. იმისთვის, რომ მკურნალობა შედეგიანი და მოკლევადიანი იყოს, აუცილებელია მალევე მიმართოთ დერმატოლოგს. ძალიან მნიშნელოვანია იზრუნოთ მენტალურ და ფიზიკურ ჯანმრთელობაზე, რადგან ყველაფერი ეს აისახება თქვენ ორგანიზმზე.