ნინი ნიქაბაძე • 1623745255

სავარცხელი - ანუ იცით თუ არა, რომ?!

შეგიძლიათ, გაიხსენოთ, რამდენი წელია, რაც თქვენი სავარცხელი ერთგულად გემსახურებათ?

 

პირადად მე, ახლახან გავიგე, რომ სავარცხლები, პირდაპირი მნიშვნელობით,  ბაქტერიების, მტვრისა თუ ქერტლის სანაშენე ბუდეა - ეს ყველაფერი კი მუდმივად ახლიდან გადამუშავდება ჩვენს სკალპზე, როდესაც ჯაგრისით მას ვეხებით. ხომ ელემენტარულია, მაგრამ გიფიქრიათ ამაზე? მე - არასდროს.

ფაქტი არა მხოლოდ უხეშად ჟღერს, არამედ რეალური საფრთხის შემცველია და შეიძლება ზიანიც კი მოგაყენოთ, მაგალითად, ბაქტერიამ შეიძლება გამოიწვიოს კანის გაღიზიანება, საბოლოო ჯამში კი თავზე გამონაყარი გაგიჩნდებათ.

როგორც უკვე გითხარით, სავარცხელში ყოველდღიურად გროვდება გარკვეული სახის მტვერი/ბაქტერია/ქერტლი, რომელთაგან მისი გაწმენდაც ხანდახან შეუძლებელი ხდება.

იცით, რომ ყოველ ჯერზე, როდესაც სავარცხელს თმაზე გადაისვამთ, ქერტლს თმას უბრუნებთ?

✅თუ სავარცხლის ჯაგრისს აკლია კბილები, ის ეფექტურად ვეღარ ასრულებს მოვალეობას, რის შედეგადაც  თქვენ თმის ფენით გაშრობისას მეტი ცხელი ჰაერის დაბერვა მოგიწევთ სასურველი შედეგის მისაღწევად, ეს კი, საბოლოო ჯამში, რა თქმა უნდა,  თმის ბოლოებს დააზიანებს

✅თუ ხუჭუჭა ხართ, სქელი თმა გაქვთ ან დაბანვის შემდგომ/დავარცხნამდე ბევრ თმის მოვლის პროდუქტს იყენებთ, სავარცხელი, დიდი ალბათობით, იმაზე უფრო ხშირად უნდა შეცვალოთ ხოლმე, ვიდრე ჩვეულებრივაა საჭირო

როგორ გავწმინდოთ სავარცხელი

ალბათ, სავარცხლის კბილებს შორის ჩახვეულ თმას ისედაც ხშირად ასუფთავებთ, თუმცა, სავარცხლის ღრმა წმენდა თვეში ერთხელ მაინცაა სასურველი.

👉ნაბიჯები: ვაშორებთ სავარცხელს თმას;

👉ჩამოვბანთ მას თბილი წყლითა და რამდენიმე წვეთი შამპუნით;

👉რამდენჯერმე შევანჯღრევთ და ვტოვებთ გასაშრობად.

თუ თქვენ გაქვთ ხის სავარცხელი, სასურველია, ის ბოლომდე არ ჩადოთ წყალში, ხოლო თუ იგი პლასტმასისაა,  შეგიძლიათ დატოვოთ წყლის თასში 20 წუთის განმავლობაში.

საბოლოო ჯამში, ის, თუ რამდენ ხანს შეგიძლიათ სავარცხელი უცვლელად მოიხმაროთ, დამოკიდებულია ფუნჯის ხარისხზე, თმის ტიპსა და ტექსტურაზე, თქვენ მიერ ჩატარებულ თმის გამაჯანსაღებელ პროცედურებსა თუ პროდუქტზე, რომელსაც მთელი თმის სიგრძეზე თუ ბოლოებში იტანთ. ასე რომ, ზემოთ ჩამოთვლილი ნიშნების მიხედვით შეგიძლიათ დასკვნები თავად გააკეთოთ და სავარცხელი საჭიროებისამებრ, მინიმუმ ყოველწლიურად შეცვალოთ (სასურველია, შეიცვალოს 6-დან 12 თვემდე, განსაკუთრებით მაშინ, თუ ის პლასტმასის ან რეზინისაა). თუმცა, აქედან მეორე პრობლემასთან მივდივართ, რომელიც საკუთარი თავის მოვლის მნიშვნელოვანებას სულაც არ ჩამოუვარდება რამით - ეს ეკოლოგიაზე ზრუნვაა.

დღესდღეობით თმის ჯაგრისების სრული უმრავლესობა პლასტმასისგანაა დამზადებული, ისინი კი, ბუნებრივია მარტივად ფუჭედებიან, რაც, საბოლოო ჯამში, ხელს უწყობს ჭარბ მოხმარებას. იაფი შემადგენლობისა და იმის გამო, რომ სასურველია, სავარცხელი გარკვეული პერიოდულობით იქნას ჩანაცვლებული ახლით, თმის ჯაგრისები ნაგავსაყრელებს ავსებენ და ოკეანეებსა და მდინარეებში ხვდებიან. ხსნა, ამ შემთხვევაში, მაღალხარისხიან ან ეკო-მეგობრულ სავარცხელებშია, რომლებიც, ჩვეულებრივ, იმისთვის იქმნებიან, რომ ბევრად უფრო დიდხანს გასტანონ, ვიდრე პლასტმასის ან რეზინის სავარცხლებმა.

შესაძლებელია თუ არა სავარცხლების გადამუშავება?

ეკოლოგიურად სუფთა თმის მოვლის საშუალებები არსებობდა თითქმის მანამ, სანამ  ზოგიერთი უმნიშვნელოვანესი ხელსაწყო შეიქმნებოდა. არქეოლოგებმა ძველი ეგვიპტისა და სხვა ადრეული ცივილიზაციების კვლევისას სავარცხლები და ჯაგრისები აღმოაჩინეს.

თუმცა დღევანდელობაში სავარცხლები პირველი თმის ჯაგრისებისგან განსხვავებით, ერთ-ერთ უდიდეს ტვირთად არიან ქცეულნი გარემოსთვის, რადგან პლასტმასის სავარცხლების გადამუშავება შეუძლებელია და კომპანიების მიერ მათი გადამუშავების პროგრამები, როგორც ჩანს, ამ დროისთვის არც კი არსებობს.

მოუფრთხილდით თავებს, ინსტრუქციების შესაბამისად, შეეცადეთ სავარცხელი თვეში ერთხელ საგულდაგულოდ გაწმინდოთ, მინიმუმ წელიწადში ერთხელ კი განაახლოთ, თუმცა ბევრად უფრო კარგ საქმეს გააკეთებთ, თუ შემდეგ ჯერზე, როდესაც სავარცხლის  შეცვლა დაგჭირდებათ, ეკო-მეგობრულ ვარიანტზე შეაჩერებთ არჩევანს.

მსგავსი სტატიები