ანა გელენავა • 1631373008

2021 ვენეციის ფილმის ფესტივალზე ჯენიფერ ლოპესის თვალისმომჭრელი გამოჩენა

ვენეციის ფილმის ფესტივალზე უამრავი ვარსკვლავი თავს ცნობილი დიზაინერების ტანისამოსით გვამახსოვრებს. წელს ჯენიფერ ლოპესი Georges Hobeika-ს თეთრი კაბით გამოჩნდა ახალი ფილმის "The Last Duel"-ის პრემიერაზე.

მისმა გამოჩენამ კიდევ უფრო დიდი გამოხმაურება გამოიწვია არა ძვირად ღირებული კაბის, არამედ მისი პარტნიორის გამო. ვარსკვლავი წითელ ხალიჩაზე ბენ აფლეკთან ერთად წარდგა. 2001 წელს ისინი ფილმ "Gigli"-ის გადაღებაზე შეხვდნენ  ერთმანეთს და მიუხედავად ჯენიფერის იმდროინდელი ქორწინებისა, წყვილმა გააგრძელა ურთიერთობა. 2002 წელს ჯენიფერი ბენ აფლეკზე დაინიშნა, მაგრამ მათი ურთიერთობა ქორწინებამდე დასრულდა. 

ამერიკელი მომღერალი, მოცეკვავე, მსახიობი და პროდიუსერი წითელ ხალიჩაზე Cartier-ის სამკაულებით გამოჩნდა. მის თეთრ კაბას ყვითელი ბრილიანტის სამაჯური, ბეჭედი და საყურე ამშვენებდა. თმის ვარცხნილობა საკმაოდ მარტივი იყო, მაგრამ მისმა სტილისტმა ინტერვიუში აღნიშნა, რომ ეს მისი ერთ-ერთი საუკეთესო ლუქი გახლდათ. 

წითელ ხალიჩაზე გამოჩენამდე ჯენიფერი და ბენი ვენეციაში უკვე დააფიქსირეს. ჯენიფერი ზოლიანი ორეული ემოსა, რომელსაც თეთრი ქუსლიანი ფეხსაცმელი შეურჩია. 

მართალია წყვილი ერთად რამდენჯერმე უკვე დააფიქსირეს, მაგრამ წითელ ხალიჩაზე გამოჩენამ ყველა ვარაუდი გააქარწყლა და ყველა დაგვარწმუნა, რომ ვარსკვლავური წყვილი დაბრუნდა. ლოპესი თავისი პარტნიორის სახელით აღნიშნულ ყელსაბამსაც ატარებს. 

 

როგორც იცით, ბენ აფლეკი 2005 წლიდან 2018 წლამდე ჯენიფერ გარნერზე იყო დაქორწინებული, რომელთანაც 3 შვილი ჰყავს. ლოპესი კი ტყუპების დედაა, რომლებიც მარკ ანტონთან ქორწინების დროს შეეძინა. ჯენიფერის ბოლო ურთიერთობა ალექს როდრიგესთან ჰქონდა.