სალომე აგურაშვილი • 1648971395

მზის სხივების გავლენა ჩვენს პროდუქტიულობაზე

ხშირად გვსმენია სეზონური დეპრესიის შესახებ, თუმცა არსებობს მთავარი კითხვა, თუ რა არის მისი ერთ-ერთი მთავარი გამომწვევი მიზეზი. ყველასთვის ცნობილია რომ ზამთრის სეზონის განმავლობაში დღე მოკლეა, ღამე კი გრძელი. ამ დროის განმავლობაში ორგანიზმამდე ნაკლები სინათლე და მზის სხივი აღწევს, რაც პირდაპირ პროპორციულად ისახება ადამიანის შრომისუნარიანობასა და განწყობაზე. 

და მაინც, ახდენს თუ არა გავლენას მზის სხივების ნაკლებობა ცივი სეზონების დროს ჩვენს ორგანიზმზე?

მზის ვიტამინი, როგორც ჩვენთვის კარგად ცნობილი D ვიტამინი წარმოიქმნება მზის ულტრაიისფერი სხივების ზემოქმედებით და მას მრავალი სასიცოცხლო ფუნქცია გააჩნია: იქნება ეს ძლიერი იმუნიტეტის შენარჩუნება, ნერვული სისტემის სწორი ფუნქციონირება თუ სხვა. 

შემოდგომის დასასრულის პირას, როდესაც ხშირდება სუსხიანი ამინდები და იკლებს თბილი მზიანი დღეები, ჩვენი განწყობაც ბუნებასთან სინქრონში დგება. მზიან ამინდში სეირნობას ყოველთვის ვაკავშირებთ განწყობის ასამაღლებელ აქტივობასთან, რაც სწორედ ამ დროს ორგანიზმში წარმოქმნილი D ვიტამინის დამსახურებაა!

ამიტომ ჩნდება კითხვა, როგორ შევუწყოთ ხელი ჩვენს განწყობასა და შრომისუნარიანობას ზამთრის პერიოდში?

სინათლის თერაპია

 

მზის სინათლე, ისევე, როგორც სიბნელე, აპროვოცირებს ჩვენს ორგანიზმში ჰორმონების გამომუშავებას.  სინათლის შემთხვევაში გამომუშავდება ჰორმონი სახელად სეროტონინი, რომელიც პასუხისმგებელია ჩვენი ხასიათის ამაღლებაზე, სიწყნარესა და კონცენტრაციის შენარჩუნებასა და დასტაბილურებას.  ხოლო სიბნელის დროს გამომუშავდება ჰორმონი მელატონინი, რომელიც დაძინებაში გვეხმარება.  აქედან გამომდინარე, როდესაც ჩვენ ყოველდღიურად ნაკლებ მზის სხივებს ვიღებთ, რაც ზამთრის პერიოდში ხშირია, ეს იწვევს ჩვენს ორგანიზმში სეროტონინის რაოდენობის კლებას და მელატონინის გამოყოფის ზრდას. შედეგად, ჩვენ ვგრძნობთ ენერგიის ნაკლებობას, არ გვაქვს ძველებური შემართება, შევასრულოთ დაკისრებული მოვალეობები, გვიჭირს დილით ადრე გაღვიძება.  სწორედ ამიტომ, შეგვიძლია, მივმართოთ სინათლის თერაპიას. 
                                                                           

სინათლის თერაპია, რომელსაც ასევე ფოტოთერაპიას უწოდებენ, დაინერგა 80-იან წლებში. თუ ჩვენი გრაფიკი საშუალებას არ გვაძლევს რომ ხშირად ვისეირნოთ გარეთ იმ პერიოდის განმავლობაში, როდესაც მზე ყველაზე მეტად ანათებს,  არსებობს სპეციალური ტექნოლოგიური დანადგარი - სინათლის ყუთი, რომელიც გახლავთ სპეციალურად შექმნილი, რათა გამოყოს საჭირო ულტრაიისფერი გამოსხივება.

როგორ მოქმედებს სინათლის ყუთი?    

სინათლის ყუთი სასურველია განთავსდეს დაახლოებით 50 სანტიმეტრის მანძილზე, რათა არ გამოიწვიოს უკუჩვენება, როგორიცაა თვალებისა და თავის ტკივილი. მისგან გამოყოფილი გამოსხივება, ყოველი წესის დაცვით გამოყენების დროს სრულიად უსაფრთხოა. შედეგად, სინათლის ყუთიდან გამოსხივებული სხივები ჩვენს ორგანიზმს ეხმარება გამოიმუშაოს საჭირო რაოდენობის სეროტონინი, ვიტამინი D და მელატონინი.

ზამთრიდან გაზაფხულისკენ

 

როდესაც ნელ-ნელა ზამთარი დასასრულისკენ მიდის და გაზაფხული გვიახლოვდება, დროა, დავემშვიდობოთ ხელოვნური გზით ვიტამინების მიღებას და ხშირად გავიდეთ მზიან ამინდში გარეთ. დღეში 30 წუთის განმავლობაში მზის სხივების ყოველდღიური მიღება საკმარისია, რათა ჩვენი ორგანიზმი საჭირო დანამატებით შეივსოს და გავხდეთ მეტად შრომისუნარიანები და ენერგიულები.

 

გაიგეთ მეტი D ვიტამინის შესახებ