ნინი ნიქაბაძე • 1623741779

SPF დეკორატიულ კოსმეტიკაში

ის, რომ SPF-ის ყოველდღიურ რუტინაში ჩასმა და სეზონების განურჩევლად გამოყენება ნებისმიერი ადამიანისთვისაა სავალდებულო, ჩემთვის, სამწუხაროდ, მხოლოდ რამდენიმე წლის წინ გახდა ცნობილი. დღესდღეობით კი სილამაზის ინდუსტრიასთან დაკავშირებული ნებისმიერი პიროვნება, ვისაც საზოგადოებისთვის ხმის მიწვდენა და ინფორმაციის გავრცელება შეუძლია, დაუღალავად საუბრობს იმის შესახებ, თუ რამდენად მნიშვნელოვანია SPF გამოვიყენოთ და კანი მზის მავნე, UV (ულტრაიისფერი) სხივებისგან დავიცვათ.

 

SPF დეკორატიულ კოსმეტიკაში

არაერთი ბრენდის დეკორატიული კოსმეტიკის პროდუქტები შეიცავენ SPF-ს და მთავარი კითხვაც სწორედ აქ ჩნდება - ნიშნავს თუ არა ეს, რომ მათი გამოყენების შემთხვევებში შეგვიძლია SPF კრემი რუტინიდან ამოვაგდოთ? განა აქვთ მათ ძალა, რომ  ჩვენი კანი მზისგან სათანადოდ დაიცვან?

ჩვენ ყოველდღიურად გვთავაზობენ ტონალურებს,  დამატენიანებლებს, პუდრებსა თუ სხვა პროდუქტს SPF-ის შემცველობით, მაგრამ კონკრეტულად რას გულისხმობს ეს?

მარტივად - ამ შემთხვევაში მზისგან დამცავი კრემი ემატება კოსმეტიკური საშუალების ფორმულას, რათა მას კანის UV სხივებისგან დაცვაში დაეხმაროს.

თუმცა უზრუნველყოფს თუ არა SPF– ის შემცველობის დეკორატიული კოსმეტიკა მზისგან შესაბამის დაცვას?

მოკლედ რომ გიპასუხოთ - არა. თუ გსურთ, რომ, მაგალითად, SPF-ის შემცველობიანმა ტონალურმა ისეთივე წარმატებით დაგიცვათ მზის მავნე ზემოქმედებისგან, როგორც ჩვეულებრივმა მზისგან დამცავმა, მოგიწევთ, იმაზე  6-7-ჯერ მეტი ტონალური დაიტანოთ სახეზე, ვიდრე აპირებდით. ანუ თქვენ დაგჭირდებათ ტონა მაკიაჟი იმისათვის, რომ მან იმ დონის დაცვა უზრუნველყოს, რომელსაც რეგულარული SPF კრემი გთავაზობთ.

ასევე, გასათვალისწინებელია, რომ FDA-ს (Food and Drug Administration - სურსათისა და წამლის ადმინისტრაცია, აშშ) მკაცრი მითითებები და კრიტერიუმები აქვს იმის შესახებ, კონკრეტულად რას წარმოადგენს მზისგან დამცავი საშუალება. შესაბამისად, ზოგიერთი დეკორატიული კოსმეტკური საშუალების მწარმოებელს, რომელსაც მზისგან დამცავი ინგრედიენტებიც აქვს ფორმულაში გამოყენებული, პრეტენზიები მაინც არ შეუძლია ჰქონდეს იმის შესახებ, რომ მისი პროდუქტი მზის მავნე ზემოქმედებისგან დაიცავს მომხმარებელს, რადგან ის FDA-ს სტანდარტებს ვერ აკმაყოფილებს.

 

როგორ უნდა გამოვიყენოთ SPF-იანი დეკორატიული კოსმეტიკა სწორად

თქვენი კანის მზის მანვე ზემოქმედებისგან ყოველდღიური დაცვა ძალზე მნიშვნელოვანია და ეს უნდა მოხდეს მზისგან დამცავი საშუალებით, რომელიც შეიცავს მინიმუმ SPF 30-ს, რათა კანი დაცული იყოს UV და UVB სხივებისგან. ამის პარალელურად კი, რა თქმა უნდა, დამატებითი სარგებლის მისაღებად შეგიძლიათ ის დეკორატიული კოსმეტიკაც გამოიყენოთ, რომლის ფორმულაშიც მზისგან დამცავი ინგრედიენტებია შერეული.

კიდევ ერთხელ: კარგად დარწმუნდით, რომ დეკორატიული კოსმეტიკა არ არის თქვენს რუტინაში ერთადერთი კომპონენტი, რომლისგანაც თქვენი კანის სათანადო დონეზე დაცვას ელით.

 

ესეც საინტერესოა: ვიტამინი B3 - კანის მბზინვარების საიდუმლო