ანა გელენავა • 1627844900

სასურველი რუჯი სახლიდან გაუსვლელად - ავტორუჯი

ყველას გვსურს ზაფხულის დაუვიწყარი რუჯი, მაგრამ ეს გარკვეულ სირთულეებთან და დროსთან არის დაკავშირებული. სწორედ ამიტომ გთავაზობთ მარტივ და უსაფრთხო გამოსავალს - ავტორუჯს!

ისევ ვუბრუნდებით ზაფხულის ყველაზე აქტუალურ თემას - რუჯს, მაგრამ ამჯერად ვისაუბრებთ არა ბუნებრივ მზის აბაზანებზე, არამედ ავტორუჯზე. ბუნებრივი რუჯის შემდეგ, ყველაზე დიდი პოპულარობით სოლარიუმი ლიდერობს, მაგრამ ჯანმრთელობისთვის არცთუ ისე მიზანშეწონილია. ამიტომ უპირატესობა ჯობს ავტორუჯს მივანიჭოთ. 

რა დადებითი მხარეები აქვს ავტორუჯს? 

✅   ავტორუჯის მეშვეობით ულტრაიისფერი სხივების გარეშე ვიღებთ სასურველ შედეგს, ეს კი თავიდან აგვარიდებს დამწვრობას და კანის ნაადრევ დაბერებას; 

✅  მისი გამოყენება შესაძლებელია ნებისმიერ სეზონის დროს;

✅  ავტორუჯის მეშვეობით შედეგის მიღება მცირე დროშია შესაძლებელი;

✅  განკუთვნილია ყველა ტიპის კანისათვის;

✅  ავტორუჯის ცალკეული ტიპები შეიცავენ კანისთვის სასარგებლო ნივთიერებებს. 

ყველასთვის მარტივი არაა კარგი რუჯის მიღება დამწვრობის გარეშე. ამასთან ერთად, რუჯის მიღება მოითხოვს დიდ დროსა და ყურადღებას. გარდა ამისა, ზოგიერთი კანის ტიპი ალერგიულია მზის სხივებზე და წარმოუდგენელიც კი არის რუჯის მიღება ბუნებრივად. მაგრამ, ვის არ უნდა ზაფხულში გარუჯული სხეული?!

სწორედ დაუვიწყარი რუჯის სურვილს მივყავართ ხელოვნურ რუჯამდე, რომელიც მცირე დროში, მარტივად და შედეგიანად გვთავაზობს სასურველ შედეგს. 

როგორ უნდა შევარჩიოთ ავტორუჯი?

ხელოვნური რუჯი უნდა შეირჩეს კანის ფერის და სასურველი შედეგის მიხედვით. ყოველ შეფუთვაზე შესაძლებელია იხილოთ თუ რომელი ავტორუჯი რამდენი ტონით უცვლის კანს ფერს.

ავტორუჯის რამდენიმე ტიპის გამოყენება არის შესაძლებელი: მუსი, სითხე, ლოსიონი და ზეთოვანი.  გამოკითხვების უმრავლესობა გვაჩვენებს, რომ მუსისა და ლოსიონის სახით ყველაზე მარტივია ავტორუჯის გამოყენება, მაგრამ ეს ყველასთვის ინდივიდუალურია. 

ავტორუჯის მოხმარებას აუცილებელი წესები აქვს, რომელთა დაცვა განაპირობებს კარგ რუჯს. მიუხედავად იმისა, რომ ძალიან ეფექტურია ამ სახით რუჯის მიღება, არასწორად გამოყენების შემთხვევაში შეიძლება ძალიან ცუდი შედეგი მივიღოთ. ყველაზე ხშირად არასწორ გამოყენებას რუჯის აჭრელებამდე მივყავართ. 

როგორ უნდა გამოვიყენოთ ავტორუჯი?

👉 აუცილებლად გამოიყენეთ სკრაბი, რათა ავტრუჯი სხეულზე თანაბრად გადანაწილდეს და ერთგვაროვანი შედეგი მიიღოთ;

👉 ზედმეტი თმისგან განთვასუფლდით რამდენიმე საათით ადრე, წინააღმდეგ შემთხვევაში კანზე ეგრეთწოდებული "მარწყვის ზედაპირი" დაგრჩებათ;

👉 გამოიყენეთ დამატენიანებელი ავტოურჯის გამოყენებამდე, კარგად დატენიანებული კანი ერთგვაროვანი რუჯის საწინდარია!

👉 იდაყვებზე, მუხლებზე, ხელის მტევნებზე და ფეხის კოჭებთან დაიტანეთ დამატებითი დამატენიანებელი; 

👉 კანზე დატანების შემდეგ დაელოდეთ კარგად შეშრეს პროდუქტი;

👉 ეცადეთ არ გამოიყენოთ რამდენიმე საათი დეოდორანტი ან სხვა სახის პარფიუმერია;

👉 ავტორუჯის კარგად გადასანაწილებლად უმჯობესი იქნება სპეციალური ხელთათმანის გამოყენება.     

ავტოურჯი სახლის პირობებში გამოსაყენებლად შესანიშნავი პროდუქტია, მაგრამ არსებობს ასევე სპრეის სახით ავტობრონზატი, რომელიც სახლის პირობებში არ გამოიყენება. ავტორუჯის გამოყენების შემდეგ უკვე რამდენიმე საათში შეგვიძლია წყალთან ურთიერთობა, მაგრამ არა სპრეის შემთხვევაში, მისი შესხმის შემდეგ მკაცრად განსაზღვრული დრო უნდა დავიცვათ წყალთან შეხებამდე, რაც საშუალოდ 8 საათს მოიცავს. 

სხეულის მომზადება ნებისმიერი სახის ავტორუჯამდე ერთი და იგივე პროცესია, მაგრამ რომელი არის თქვენთვის უფრო შესაფერისი და მარტივი გამოსაყენებელი ეს უკვე თქვენი გადასაწყვეტია. ფაქტი ერთია, რომ მზის აბაზანების გარეშეც შეგვიძლია  სასურველი რუჯის ეფექტის მიღწევა.