ანა გელენავა • 1627061659

როგორ მივიღოთ სასურველი რუჯი?!

რა არის იმაზე აქტუალური თემა ზაფხულის ცხელ სეზონზე თუ არა რუჯი და მზისგან დამცავი საშუალებები?!

რუჯის მიღება ალბათ ყველასთვის თუ არა, უმეტესი ნაწილისთვის სასურველია, თუმცა ხშირად რუჯის მიღების დროს საჭიროა გარკვეული ნაბიჯების მიყოლა.

სხვადასხვა კანის ტიპის მიხედვით, რუჯის მიღების წესები განსხვავებულია. მიუხედავად ამისა, ძირითადი წესები ყველასთვის მსგავსია. 

პირველი და უმთავრესი ფაქტორი რუჯის მიღების დრო გახლავთ. იგი განაპირობებს რუჯის ფერს და კანის სიჯანსაღის შენარჩუნებას. ექიმები გვირჩევენ მივყვეთ მკაცრად განსაზღვრულ შუალედს, რომელიც 10:00-დან 17:00 საათამდე დროს მოიცავს, სხვა შემთხვევაში ყველაზე საშიში მზის სხივები საკმაოდ დიდ ზიანს მოგვაყენებს. 

მანამ სანამ რუჯის მიღების პროცესს დაიწყებთ, რეკომენდებულია სხეული წინასწარ მოამზადოთ და მიჰყვეთ შემდეგ რჩევებს:

👉გამოიყენეთ სკრაბი - კანი მეტად ერთგვაროვანი გახდება

👉დაიტანეთ SPF მზეზე გასვლამდე  20 წუთით ადრე - აუცილებელია დამცავის ორ საათში ერთხელ განახლება

👉მიიღეთ დიდი რაოდენობის წყალი და უზრუნველყავით სხეულის ჰიდრატაცია, რათა მიიღოთ ჯანსაღი რუჯი;

👉დაიცავით მზისგან და დაფარეთ შესაბამისი მატერიით პიგმენტური ლაქები, ხალები შეძლებისდაგვარად. სასურველია, მოარიდოთ მზეს თვალებიც; 

თუ გსურთ დააჩქაროთ რუჯის მიღების პროცესი და გსურთ უფრო ოქროსფერი რუჯი მიიღოთ, შეგიძლიათ გამოიყენოთ ქოქოსის ან კაკაოს ცხიმი. აუცილებელია ნებისმიერი პროდუქტის დატანების დროს სხეული იყოს მშრალი, რადგან წყალი გამოირჩევა ისეთი სტრუქტურით, რომელიც ხელს უწყობს მზის დამწვრობის მიღებას.

და მაინც, როგორ უნდა შევარჩიოთ SPF რუჯის მიღების წინ?

მზისგან დამცავი საშუალებების გამოყენება მხოლოდ მზის დამწვრობის თავიდან ასაცილებლად არ არის საჭირო,არამედ იგი გაცილებით დიდი პრობლემების განვითარებისგან გვიცავს.

არსებობს ორი ტიპის ულტრაიისფერი სხივი, A - რომელიც ღრმად აზიანებს კანს და იწვევს ნაოჭებსა თუ კანის დაბერებას და B - რომელიც ზედაპირულად, ხილულად აზიანებს კანს.

გასათვალისწინებელია რომ, მზის სხივები ერთნაირად აზიანებს ყველა ტიპის და ფერის კანს, იქნება ეს თეთრი, ხორბლისფერი თუ ნებისმიერი სხვა.

მზისგან დამცავი პროდუქტის შერჩევის დროს აუცილებლად უნდა მივაქციოთ ყურადღება იცავს თუ არა ის ორივე ტიპის ულტრაიისფერი სხივისგან კანს.

ყველას შეგვიმჩნევია დამცავ საშუალებებზე ციფრები, სწორედ ისინი განსაზღვრავენ რამდენად ძლიერია ესა თუ ის SPF. მისი მაჩვენებელი ძირითადად 15-დან 50-მდე მერყეობს. განსაკუთრებით მგრძნობიარე და ღია ფერის კანისთვის კი უფრო მაღალი, 70-იანი დამცავის გამოყენებაა საჭირო. 

იმისთვის, რომ სასურველი რუჯი მივიღოთ კანის მინიმალური დაზიანებით, საჭიროა ყველა ზემოჩამოთვლილი რჩევის გათვალისწინება. მიუხედავად ამისა, ზაფხულში კანის დამწვრობის მიღება საკმაოდ ხშირია, ამიტომ გაიგეთ მეტი თუ როგორ შეგვიძლია ვუმკურნალოთ მზისგან მიღებულ დამწვრობას.

.