ნინი ნიქაბაძე • 1626867556

როგორ ამოვიცნოთ სახის კანის ტიპი?!

გიფიქრიათ თუ რამდენად მნიშვნელოვანია ვიცნობდეთ საკუთარ სხეულსა და ორგანიზმს?

სახის კანი არ არის გამონაკლისი, მისი შეცნობა და შესწავლა აუცილებელია მისი სრულფასოვანი მოვლისათვის. 

კოსმეტოლოგიასა და დერმატოლოგიაში სახის კანის 5 ტიპი გამოიყოფა: ნორმალური, ცხიმიანი, მშრალი, კომბინირებული და მგრძნობიარე.

გასაკვირი არ არის რომ, თითოეული ტიპის კანი, განსხვავებულ მოვლის საშუალებებსა და პროდუქტებს საჭიროებს.
სახის მოვლის საშუალებების ფორმულები, კანის განსხვავებული ტიპებისათვის არის შემუშავებული. არასწორად შერჩეულმა პროდუქტმა, შესაძლოა მნიშვნელოვანი ზიანი მიაყენოს კანის ზედაპირს. 

სწორედ ამიტომ წარმოგიდგენთ სახის კანის ტიპებს და მათ მთავარ დამახასიათებელ ნიშნებს:

🎇 ნორმალური ტიპის კანი

როგორც წესი, ნორმალური ტიპის კანი ყველაზე ნაკლებად პრობლემატური და მეტად მარტივი მოსავლელია. ამ ტიპის კანზე იშვიათად ჩნდება გაღიზიანებული უბნები, არ აღინიშნება სიწითლე, ჭარბცხიმიანობა და გამოკვეთილი ფორები.

ნორმალური ტიპის კანი საჭიროებს რეგულარულ გასუფთავებას, მზისგან დაცვას და ზომიერ დატენიანებას.

🎇 ცხიმიანი ტიპის კანი

ცხიმიანი კანი ხასიათდება არაერთგვაროვანი ზედაპირით, გაფართოვებული ფორებით და ხშირი გამონაყარით. თუ ამ ტიპის კანი გაქვთ, მოერიდეთ უხეშ მექანიკურ ჩარევებს, როგორიცაა, მაგალითად, სკრაბის გამოყენება.

აუცილებელია, სწორად შეარჩიოთ კანის მოვლისთვის საჭირო საშუალებები. ყურადღება მიაქციეთ შემადგენლობას - პროდუქტი არ უნდა შეიცავდეს მავნე ნივთიერებებს და არ უნდა იყოს მიმართული ფორების ჩახშობისკენ.

🎇 კომბინირებული ტიპის კანი

კომბინირებულ კანს განსაკუთრებული ზრუნვა სჭირდება, რადგან გარკვეულ უბნებზე ის ცხიმიანია, სხვა დანარჩენზე კი მშრალი, მგრძნობიარე ან ნორმალური ტიპის. როგორც წესი, ამ ტიპის კანის ზედაპირზე გამოკვეთილია ფორები, ჩნდება შავი წერტილები და თავს იჩენს გამონაყარი.

მოერიდეთ ალკოჰოლის  მაღალი შემცველობის მქონე პროდუქტებს და ცხიმის გამოყოფის მაკონტროლებელი საშუალებების მთელ სახეზე გამოყენებას. არ დაივიწყოთ T-ზონა და მასზე განსაკუთრებული ყურადღების მიპყრობა.

🎇 მშრალი ტიპის კანი

მშრალი კანზე ფორები გამოკვეთილი არ არის, ახასიათებს უხეში და არაერთგვაროვანი ზედაპირი, გამოკვეთილია სისხლძარღვები და მარტივად ჩნდება კანის ზედაპირული ნაოჭები.

მშრალი კანი ინტენსიურ დატენიანებას და დაცვას საჭიროებს. მოერიდეთ მზის პირდაპირ სხივებს, ქარს, კანის ცხელი წყლით ჩამობანვას. გამოიყენეთ მზისგან დამცავი საშუალებები და დღის და ღამის შესაბამისი დამატენიანებელი საცხები.

🎇 მგრძნობიარე ტიპის კანი

მგრძნობიარე კანზე გამოხატულია სიწითლე, დაჭიმულობა, ქავილის და წვის შეგრძნება. ასეთი ტიპის კანი მძაფრად რეაგირებს გარემო ფაქტორებზე. მოერიდეთ განსაკუთრებულად ცხელ ან ცივ ამინდებს, გამოიყენეთ მზისგან დამცავი ყველა სეზონზე და დაიტენიანეთ კანი ინტენსიური დამატენიანებლებით, რომელიც იქნება ჰიპოალერგიული და არაკომედოგენური.

📌 აღსანიშნავია, რომ გარემო ფაქტორების, მოვლის საშუალებების და ასაკის მატებასთან ერთად, კანის ტიპი და სტრუქტურა შესაძლებელია შეიცვალოს. ამიტომ, საჭიროა ხშირი დაკვირვება, რადგან სწორად შევარჩიოთ კანის მოვლის რუტინა და შესაბამისი პროდუქტები.