ანა გელენავა • 1649678395

დღის და ღამის დამატენიანებელი კრემის მნიშვნელობა კანის მოვლის რუტინაში

დამატენიანებელი საცხი კანის მოვლის  ერთ-ერთი მთავარი და შეუცვლელი ინგრედიენტია და ის, არამარტო დღის,არამედ ღამის მოვლის რუტინაშიც გვხვდება. საინტერესოა, ნამდვილად არის თუ არა საჭირო დღისა და ღამის საცხის გამოყენება?!

როგორც წესი, დამატენიანებელ საცხს ყველაზე დიდ მნიშვნელობას ვანიჭებთ და კანის სიჯანსაღეს, დატენიანებას, ერთგვაროვნებას თუ ხავერდოვნებას სწორედ საცხის ეფექტურობას ვაწერთ. რეალურად რა განსხვავებაა დღისა და ღამის საცხს შორის ცოტამ თუ იცის, მაგრამ მათ ცალკეულ გამოყენებას რუტინაში მაინც ჩვეულებისამებრ აგრძელებენ.


დღის დამატენიანებელი კრემი

 

პირველი, რაც დღის დამატენიანებელ კრემს განასხვავებს ღამის საცხისგან არის SPF შემცველობა. მზის სხივებისგან თავის დაცვა ძალიან მნიშვნელოვანია ნებისმიერ ამინდსა და გარემოში, რაშიც სწორედ SPF გვეხმარება. მათთვის, ვისაც არ უყვარს რამდენიმე სახის კრემის გამოყენება ამჯობინებს დამატენიანებელ საცხს SPF-ით. გარდა ამისა, დღის კრემი ბევრად უფრო მსუბუქია, რაც გვეხმარება დღის განმავლობაში ზედმეტი ცხიმიანობის და სიმძიმის გარეშე ვატაროთ მაკიაჟი. ისევ და ისევ მათთვის, ვისაც არ სურს მაკიაჟის ბაზის გამოყენება და მსუბუქი მაკიაჟისთვის ამზადებს კანს ზედმეტი საფეხურების თავიდან აცილებით, მსგავსი დამატენიანებელი კრემი ითვისებს აღნიშნულ ფუნქციასაც. ამავდროულად, დღის კრემი შეიცავს ისეთ ინგრედიენტებს, რომელთა გამოყენება დღის საათებში დაშვებულია.


ღამის დამატენიანებელი კრემი

 

დღის დამატენიანებელი, როგორც უკვე ვთქვით, მარტივად შეიწოვება და ძალიან მსუბუქია კანზე. განსხვავებულია ღამის კრემის კონსისტენცია და შემადგენლობაც. პირველ რიგში, ღამის დამატენიანებელი ბევრად უფრო სქელი და მძიმეა, შესაბამისად კანს მისი შეწოვისთვის უფრო დიდი დრო სჭირდება. ასევე, ის შეიცავს ისეთ ინგრედიენტებს, როგორიცაა რეტინოლი და ჰიალურონის მჟავა. ღამის კრემი ერთგვარი აღმდგენია, რომელიც დღის განმავლობაში დაღლილ და დაზიანებულ კანს თავდაპირველ იერსახეს უბრუნებს.


არის თუ არა საჭირო ორივე ტიპის საცხის გამოყენება?!

 

დღისა და ღამის საცხებს შორის განსხვავებებზე უკვე ვისაუბრეთ, მაგრამ  არის თუ არა საჭირო ორივე ტიპის კრემის გამოყენება კანის მოვლის რუტინაში?! პასუხი კი ასეთია - სავალდებულოა, თუ გსურთ კანმა სხვადასხვა სასარგებლო ნივთიერებები მიიღოს. გარკვეულწილად, ეს დამოკიდებულია ასაკზე და კანის ტიპზე, მაგრამ ორივე საცხის გამოყენება ნამდვილად ძალიან ეფექტური და სასარგებლოა. თუ გსურთ, რომ თქვენი კანი კარგად გამოკვებოთ, კარგად იცნობთ რა სჭირდება თქვენ კანს და სწორად არჩევთ ინგრედიენტებს, დღის კრემი კარგ დაცვას და მსუბუქ დატენიანებას, ხოლო ღამის  კრემი კი კანის სტრუქტურას აღგიდგენთ და მის ღრმა დატენიანებას უზრუნველყოფს.


რომელი უფრო მნიშვნელოვანია - დღის თუ ღამის კრემი?

 

თუ არჩევანი უნდა გააკეთოთ დღისა და ღამის საცხს შორის უპირატესობა დღის დამატენიანებელს მიანიჭეთ. SPF ძალიან მნიშვნელოვანია ჩვენი კანისთვის, რათა თავიდან ავიცილოთ კანის ნაადრევი დაბერება, ნაოჭები და ზედაპირის დაზიანება. მისი გამოყენება ღამე კანს არ აზიანებს, ამიტომ დღის დამატენიანებელი შეგიძლიათ ღამის რუტინაშიც გამოიყენოთ.