ანა გელენავა • 1661766241

კოლაგენი - ჯანსაღი კანის საიდუმლო

იცოდით, რომ კოლაგენი ერთ-ერთი მნიშვნელოვანი პროტეინია, რომელიც უზრუნველყოფს ჩვენ სილამაზეს?!

თმის, კანის, ძვლების, ფრჩხილების, სახსრებისა და კუნთების სტრუქტურა სწორედ ამ ნივთიერებაზეა დამოკიდებული.

რა არის კოლაგენი და როგორ უნდა გამოვიყენოთ თავის მოვლის რუტინაში?! 

კოლაგენი არის პროტეინი, რომელიც კანს ანიჭებს ელასტიკურობას და უზრუნველყოფს მის ახალგაზრდულ, ჯანსაღ იერს. ასაკის მატებასთან ერთად ორგანიზმში მისი გამომუშავება მცირდება, სწორედ ამიტომ საჭირო ხდება კოლაგენის დამატება თავის მოვლის რუტინაში. 20 წლიდან უკვე მცირდება მისი გამოყოფა, მაგრამ გარდა ასაკისა მის შემცირებას მოწევა, შაქრის ჭარბი მიღება და არაჯანსაღი ცხოვრების წესიც იწვევს. თავის მოვლის რუტინაში მისი შემოტანა არა მხოლოდ საცხების სახით, არამედ საკვები დანამატის სახითაც შეგიძლიათ მიიღოთ.

როგორც უკვე აღვნიშნეთ, კოლაგენი 20 წლიდან უნდა დავამატოთ რუტინაში, მაგრამ როგორ უნდა გამოვიყენოთ და რა შედეგები აქვს მის აქტიურ გამოყენებას ?!

კოლაგენი ძირითადად გვხვდება ანტიასაკობრივი ხაზის საცხებში და აქტიურად გამოიყენება კანის გაახალგაზრდავებისთვის, გამკვრივებისა და გაჯანსაღების მიზნით. რეალურად კოლაგენის გამოყენება კანზე დღისა თუ ღამის რუტინაში არ აღგვიდგენს ნივთიერების დანაკლისს და ვერ ჩაანაცვლებს ორგანიზმში ბუნებრივად გამოყოფილ კოლაგენს. ძირითადი დანიშნულება, რის გამოც ამ ნივთიერებას ვიყენებთ კანის დატენიანება გახლავთ.

კოლაგენის შემცველი საცხები ძალიან კანის ღრმა დატენიანებას უზრუნველყოფს და მისი გამოყენება როგორც დღის ასევე, ღამის რუტინაში არის შესაძლებელი. ძალიან მნიშვნელოვანია მზისგან დამცავი საცხის გამოყენება, რადგან ულტრაიისფერი სხივები სწორედ კოლაგენს აზიანებს. სწორედ ამიტომ და სხვა მრავალი მიზეზის გამო, არ დაგავიწყდეთ ყოველდღიურ რუტინაში SPF-ის გამოყენება.

კოლაგენის მიღების წყარო 

როგორც უკვე აღვნიშნეთ, კოლაგენის მიღება საცხების გარდა საკვების მეშვეობითაც შეგვიძლია. არჩევანი შეაჩერეთ C ვიტამინის შემცველ საკვებზე, მაგალითად ფორთოხალი, ბულგარული წიწაკა და ციტრუსები. ასევე შეგიძლიათ რაციონში დაამატოთ თხილი, ზეითუნის ზეთი, კვერცხი, ქათმის ხორცი და თევზი.

ამავდროულად, აუცილებელია ძილის რეჟიმის დარეგულირება, რადგან ეს გავლენას ახდენს კოლაგენის გამომუშავებაზე ჩვენ ორგანიზმში.

კოლაგენის უარყოფითი ჩვენებები

მართალია კოლაგენი ძალიან მნიშვნელოვანია კანისთვის და მას კარგად ატენიანებს, მაგრამ შეიძლება მან ალერგიული რეაქციაც გამოიწვიოს. აუცილებელია სწორად შეარჩიოთ საცხი და ალერგიული რეაქციის შემდეგ (სიწითლე, ქავილი, გამონაყარი) დაუყოვნებლივ შეწყვიტოთ გამოყენება.