ნინი ნიქაბაძე • 1623747017

C ვიტამინი და სტერეოტიპები, რომლებიც მის გარშემო არსებობს

ბოლო წლებია თავის მოვლა თავისი მრავალსაფეხურიანი რუტინებით, ტანის, სახისა თუ თმის სიჯანსაღეზე ზრუნვა იმაზე მნიშვნელოვანი გახდა, ვიდრე ოდესმე ყოფილა. ყველა ჩვენგანს გვყავს საყვარელი ვლოგერები თუ ბლოგერები, რომლებიც საკუთარ გამოცდილებას გვიზიარებენ და სხვადასხვა პროდუქტის მიმოხილვებს მუდმივ რეჟიმში გვთავაზობენ, თუმცა ჩვენ, მომხმარებლებს, ხშირად გვეზარება იმაზე მეტი ინფორმაცია მოვიძიოთ, ვიდრე ისინი გვაწვდიან. ამიტომ, მათი ვიდეოების ყურებისას იმედით ვივსებით, რომ გარკვეული პროდუქტი, რომელმაც მათ კანზე დადებითად იმოქმედა, ჩვენც ანალოგიურ შედეგს მოგვიტანს.

კომპანიების მარკეტინგულმა გათვლებმა თუ ინფლუენსერების შეფასებებმა ხშირად შეიძლება შეცდომაში შეგვიყვანოს, თუმცა არა იმიტომ, რომ ისინი იტყუებიან, არამედ იმიტომ, რომ ჩვენ ხშირად გვეზარება მოწოდებული ინფორმაციის დახარისხება, კრიტიკული კითხვების დასმა და საკუთარ კანზე მეტი დაკვირვების წარმოება.

რუტინაში  C ვიტამინის აქტიურად გამოყენება დღესდღეობით აქტუალური თემაა, ამიტომ მის გარშემო არსებული სტერეოტიპების მიმოხილვას გთავაზობთ. ვინაიდან ზემოთ აღნიშნული ერთ – ერთია ყველაზე პოპულარულ ვიტამინთა შორის, კარგი იქნება, თუ მის შესახებ  საბაზისო ინფორმაცია გვეცოდინება, რათა შემდგომში ჩვენი თავის მოვლის რუტინაში მისი სწორად ჩასმა შევძლოთ.

ზოგადად, პროდუქტს შესაძლოა ფრონტალური მხრიდან ეწეროს, რომ ვიტამინ C-ს შემცველია, მაგრამ ინგრედიენტების ჩამონათვალს თუ გავეცნობით,  ვნახავთ, რომ ის შეიძლება წარმოდგენილი იყოს, როგორც L - ასკორბინის მჟავა (L-Ascorbic Acid - სხვა სახელით ასკორბილ გლუკოზიდი (ascorbyl glucoside)), მაგნიუმის ასკორბილის ფოსფატი (magnesium ascorbyl phosphate), ასკორბილის ტეტრაიზოპალმიტატი (ascorbyl tetraisopalmitate) და სხვა, რომლებიც C ვიტამინისგან მიღებული ინგრედიენტებია, მაგრამ შეიცავენ დანამატებს, რათა შემადგენლობის საბოლოო სახე უფრო სტაბილური იყოს ან უფრო ადვილად შეიწოვებოდეს. რაღა თქმა უნდა, C ვიტამინის თითოეულ სახეობას კანზე სხვადასხვა გავლენა აქვს - მათ შეიძლება თქვენი კანი გააღიზიანონ ან ძალიან ეფექტური გავლენა იქონიონ მასზე.

ასე რომ, თუ რუტინაში ჩასვით პროდუქტი ვიტამინ C-ს შემადგენლობით და იგრძენით, რომ იგი თქვანმა კანმა არ მიიღო, აუცილებლად შეამოწმეთ, ზუსტად რა სახის ვიტამინი C-ს შემცველობისაა იგი, რა არის მასში C ვიტამინის პროცენტული მაჩვენებელი და რა pH დონის საერთო ფორმულა იყო გამოყენებული. საბოლოო ჯამში, ეს მოგცემთ წარმოდგენას იმის შესახებ, თუ რომელი ინგრედიენტი გიღიზიანებთ კანს და შეძლებთ შანსი C ვიტამინის სხვა სახეობას მისცეთ.

 

არის თუ არა ვიტამინი C სარგებლის მომტანი მხოლოდ კანის გარკვეული ტიპებისთვის?

ჩვენს სხეულს არ შეუძლია საკუთარი ვიტამინი C გამოიმუშაოს, ამიტომ მისი ორგანიზმისთვის მიწოდების გზები კვებაზე ან კანზე ადგილობრივად დატანაზე გადის. თუმცა კარგი ამბავია ისაა, რომ ვიტამინი C ყველანაირი ტიპის კანისთვის შეიძლება იყოს შესაფერისი, თქვენ მხოლოდ ის გევალებათ, რომ მოთმინება გამოიჩინოთ და საკუთარი თავისთვის მისი სწორი ტიპი შეარჩიოთ.

 

მაგალითად: თუ მგრძნობიარე კანი გაქვთ, შეარჩიეთ წარმოებული პროდუქტი, რომელიც ნაკლებად მჟავიან ფორმულას შეიცავს; ხოლო თუ შედეგების სწრაფად დანახვა გსურთ, შეარჩიეთ წარმოებული პროდუქტი, რომლის უკანაც უფრო ძლიერი კლინიკური კვლევები დგას, რომლებიც უშუალოდ თქვენს პრობლემებსა და მოთხოვნებზე იყო ორიენტირებული.

შესაძლოა თუ არა, რომ C ვიტამინმა მზის მიმართ  მგრძნობელობის გამძაფრება გამოიწვიოს?

სუფთა სახით ვიტამინი C  მჟავას წარმოადგენს, რის გამოც ბევრს სჯერა, რომ იგი მხოლოდ საღამოს საათებში უნდა იქნეს გამოყენებული. თუმცა რეალობა სხვაა: სხვა მჟავებისგან განსხვავებით, ვიტამინი C სულაც არ აჩვენებს, რომ იცი  მზის მიმართ მგრძნობელობას ზრდიდეს. პირიქით, კვლევებმა აჩვენა, რომ ამ ძლიერ ანტიოქსიდანტს შეუძლია დაგვეხმაროს მზისგან ზიანის მოყენებისგან თავის არიდებაში. თუმცა ეს, რაღა თქმა უნდა, არ ნიშნავს, რომ SPF კრემი რუტინიდან უნდა ამოვიღოთ! (C ვიტამინის  SPF- თან დაწყვილება, შესაძლოა, კარგი იდეა აღმოჩნდეს).

ასე რომ, თქვენ შეგიძლიათ თქვენი პროდუქტი, რომელიც ვიტამინ C-ს შემცველობისაა, როგორც დილის, ისე საღამოს საათებშიც თავისუფლად გამოიყენოთ, გადაწყვეტილება კი, რა თქმა უნდა, ინდივიდუალურია და დამოკიდებულია იმაზე, თუ რა სარგებელს ეძებთ და რამდენად კომფორტულად ჩაჯდა იგი თქვენს რუტინაში.

მაგალითად, თუ დღის განმავლობაში ანტიოქსიდანტური დახმარება გჭირდებათ, C ვიტამინის შემცველობიანი კრემი წაისვით დილით, ხოლო  თუ კონცენტრირებული ხართ კანის გამკვრივებასა და გაახალგაზრდავებაზე, მაშინ, შესაძლოა, საღამოს რუტინაში მისი ჩართვა უფრო სასარგებლო აღმოჩნდეს თქვენთვის, რადგან ზოგადად ვიტამინი C კოლაგენის გამომუშავებას აძლიერებს.

რაც მეტი C ვიტამინი, მით უკეთესი?!

ფორმულა, რომელიც შეიცავს C ვიტამინის პროცენტულად მაღალ მაჩვენებელს, მაგრამ არ არის სათანადოდ სრულყოფილი, შეიძლება ბევრად უფრო ნაკლები შედეგის მომტანი აღმოჩნდეს საბოლოო ჯამში, ვიდრე ფორმულა, რომელსაც C ვიტამინის მცირე კონცენტრაცია აქვს. გარდა ამისა, თუ ჩვენთვის ცნობილია, რომ კონკრეტულ პროდუქტს კანი უკეთესად იწოვს, მასში უფრო მცირე კონცენტრაციით არსებულმა C ვიტამინმა შეიძლება უფრო თვალსაჩინო შედეგი გამოიღოს, ვიდრე იმ ფორმულიანმა, რომელიც უფრო მეტი პროცენტული მაჩვენებლით გამოირჩევა, მაგრამ ნაკლებად აღწევს კანში. დასკვნა მარტივია: კონკრეტული პროდუქტი, რომელიც C ვიტამინითაა გაჯერებული, შესაძლოა, იმაზე ბევრად უფრო სუსტი მოქმედებისა აღმოჩნდეს, ვიდრე ის, რომელიც პროცენტულად ნაკლებ C ვიტამინს შეიცავს.

როგორ უნდა წარმართოთ ნავიგაციის პროცესი, რათა გაიგოთ, რომელია  C ვიტამინის სახეობა, რომელიც თქვენს კანს სჭირდება და რომლის მიმართაც მას მიმღებლობა გააჩნია?

პირველ რიგში, ყოველთვის მიაქციეთ ყურადღება ყუთის უკანა მხარეს თუ საიტზე, აღწერაში დატანებულ სიას, სადაც დეტალურადაა ჩამოთვლილი პროდუქტის შემადგენლობა. ნუ დაეყრდნობით მხოლოდ C ვიტამინის პროცენტულ მაჩვენებელს, აუცილებლად გაითვალისწინეთ მისი ტიპიც, ეს, საბოლოო ჯამში, გაგიადვილებთ საკუთარ კანზე დაკვირვების პროცესის მარტივად წარმართვას და სწორი დასკვნების გამოტანაში დაგეხმარებათ.