ანა გელენავა • 1661767214

ახალგაზრდა და ჯანსაღი კანის საიდუმლო - ყველაფერი რეტინოლის შესახებ

კანის მოვლა, ინგრედიენტები და რუტინები განსაკუთრებით საინტერესო გახდა ბოლო წლების განმავლობაში.  ცნობილი სახეები ყოველდღიურად გვიზიარებენ თავიანთ აღმოჩენებს, ტექნიკებს და წლების განმავლობაში შემუშავებულ საფეხურებს. რეტინოლი სწორედ ის ინგრედიენტია, რომელზედაც ყველა საუბრობს და განსაკუთრებული პოპულარობით სარგებლობს.

არის თუ არა რეტინოლი მართლაც მნიშვნელოვანი ინგრედიენტი და რას გვაძლევს მისი გამოყენება?!

რა არის რეტინოლი?!

რეტინოლის შესახებ უკვე ყველას ბევრი გვსმენია, მაგრამ ზოგი მას იცნობს როგორც ანტი-ასაკობრივ ინგრედიენტს, ზოგისთვის კი ის აკნეს მკურნალია. ეს ინგრედიენტი არის  A ვიტამინის აქტიური ფორმა, რომელიც ებრძვის ნაოჭებს და აღადგენს კანის სტრუქტურას. რთულია ისეთი ინგრედიენტის პოვნა, რომელსაც ყველა საჭირო თვისება აქვს და რეტინოლი სწორედ ერთ-ერთი მათგანია. ეს სწორედ ის ნივთიერებაა, რომელიც ერთდროულად მიკრო-ნაჭოებზე იმუშავებს, გამონაყარს უმკურნალებს, კანის სტრუქტურას აღადგენს და მას ელასტიურ, ნაზ ელფერს მიანიჭებს. 

 


  რა ასაკიდან და როგორ უნდა გამოვიყენოთ რეტინოლი?!

 პირველ რიგში აუცილებელია რეტინოლის გამოყენებასთან ერთად კანი ღრმად დავატენიანოთ. რუტინაში ნელ-ნელა ჩასვით რეტინოლი, აარჩიეთ გამოყენების პრინციპი და თავი შეიკავეთ ძლიერი ნივთიერებების გამოყენებისგან. შეგიძლიათ დამატენიანებლის შემდეგ გამოიყენოთ რეტინოლი და შემდეგ კვლავ დაიტენიანოთ კანი.

აუცილებელია მისი წასმის შემდეგ რამდენიმე წუთი დაელოდოთ და შემდეგ კვლავ გამოიყენეთ დამატენიანებელი. ძალიან მნიშვნელოვანია პროდუქტი სწორი რაოდენობით, გადაჭარბების გარეშე გამოიყენოთ. რეტინოლის თვალების გარშემო გამოყენება არ არის დაშვებული, თუ ამ ზონისთვის არ არის განკუთვნილი.

იმაზე, თუ როდის უნდა დავიწყოთ რეტინოლის გამოყენება დერმატოლოგთა აზრი იყოფა. ზოგი მიიჩნევს, რომ მისი გამოყენება შესაძლებელია 20 წლიდან, ზოგი კი ფიქრობს, რომ ეს ადრეა და გვირჩევს 25+ წლიდან გამოვიყენოთ აქტიურად.  

 

👉ინგრედიენტის ტიპი - ანტიოქსიდანტი; 

👉მთავარი დანიშნულება ცხიმიანობის დაბალანსება, კოლაგენის გამოყოფის მომატება და კანის უჯრედების ცვლა.

👉რეტინოლის გამოყენება შეუძლია ყველას, არ დაიშვება ორსულობის დროს. ასევე, არ არის სასურველი გამოყენება მათთვის ვისაც როზაცეა ან ეგზემა აქვთ

👉რეტინოლის გამოყენება დაიწყეთ კვირაში ორჯერ ღამის რუტინაში, აუცილებლად დამატენიანებელთან ერთად. 

👉არ გამოიყენოთ უხეში ამქერცლავი საშუალებები/სკრაბები, ალფა/ბეტა ჰიდროქსიდი მჟავები, ბენზოლის ზეჟანგი,       C ვიტამინი. მათი გამოყენება რეტინოლთან ერთად შეიძლება კანის გაღიზიანების მიზეზი გახდეს. 

 

როგორ მუშაობს რეტინოლი?!

ეს ინგრედიენტი ძალიან მნიშვნელოვანია კანისთვის. რეტინოლის დამსახურება ჯანსაღი, ელასტიური კანია, რაც მისი საიდუმლო თვისების შედეგია. რეტინოლი კანს ეხმარება მალევე მოიშოროს და ჩაანაცვლოს მკვდარი უჯრედები, აღადგინოს დარღვეული სტრუქტურა, იმუშაოს მიკრონაოჭებზე, დაარეგულიროს ცხიმიანობა და შედეგად ვიღებთ ჯანსაღ კანს. გრძელვადიანი გამოყენების შემდეგ, რეტინოლი კანის ელფერსაც ცვლის. ის აშორებს მუქ წერტილებს კანიდან, არათანაბარ სახის კანი კი ერთ ტონალობაში მოჰყავს. მზის სხივებისგან დატოვებულ არათანაბარ ტონალობას, ყავისფერ ლაქებს რეტინოლი აუცილებლად გააქრობს, მაგრამ შედეგს რამდენიმე დღეში ნუ დაელოდებით. ინგრედიენტის სრული შედეგის შესამჩნევად მისი გრძელვადიანი და მუდმივი გამოყენებაა საჭირო.

 


 

რა უარყოფითი მხარეები აქვს მის გამოყენებას?!

მთავარი საშიშროება კანის გამოშრობა და აქერცვლაა.  სწორედ ამის თავიდან ასაცილებლად არის საჭირო კანის ღრმა დატენიანება. ასევე, რეტინოლი უფრო მგრძნობიარეს ხდის კანს და სხვადასხვა პროცედურის ჩატარებამდე მინიმუმ ერთი კვირით ადრე უნდა შეწყვიტოთ მისი გამოყენება. სახის მასაჟების, ნიღბების, გაწმენდისა თუ ლაზერის გამოყენებამდე აუცილებლად ამოიღეთ ნივთიერება რუტინიდან. ასევე, იქიდან გამომდინარე, რომ რეტინოლი კანს უფრო მეტად მგრძნობიარეს ხდის აუცილებელია მზისგან დამცავის გამოყენება. სასურველია SPF30< გამოვიყენოთ და მაქსიმალურად  დავიცვათ კანი მზის სხივებისგან. აღვნიშნეთ, რომ C ვიტამინის გამოყენება მიზანშეწონილი არ არის, მაგრამ როდესაც რეტინოლი კანს მიეჩვევა და ის თქვენი რუტინის განუყოფელი ნაწილი გახდება, შეგიძლიათ დღის რუტინაში დაამატოთ C ვიტამინის საფეხური და მზისგან დამცავამდე გამოიყენოთ.